O secular oficio tradicional da ferreiría herdado durante
longas xeracións e mais a vida rural das montesas terras de Taramundi
confírenlle a esta comarca un especial caracter artesán
Taramundi, terra de Cultura
Dominado
polas altitudes do Ouroso nos Oscos e cortado
polos profundos vales do río Ouria cara A
Pontenova, Taramundi é un paradiso ecolóxico ideal para
longos roteiros a través da súa cultura tradicional e da
súa natureza. Ben sexa pola ruta pintoresca e artesana entre Lourido
e Piñeiro ou pola Fervenza da Salgueira no río Turia, ou
simplemente polas vistas da ría do Eo desde a Serra de Eiroá,
Taramundi merece ser visitado pola sua óptima oferta natural e cultural.
Do seu legado arquitectónico e cultural hai que destacar
as igrexas de Nosa Señora do Carmen en Ouria e San Martín
en Taramundi, co seu retablo obra de Fernández da Veiga, discípulo
do grande mestre galego Gregorio Fernández. Son moi enxebres os
hórreos
e cabazos de Bres e os de Taramundi, encontrándose tamén
na vila a Casa Rectoral do séc.XVIII e o Monumento a Manuel Lombardero.
Taramundi contribuiu grandemente a cultivar as Letras Galegas ofrecendo
xenerosamente intelectuais e poetas como Conrado Vilar Loza e Antolín
Santos, gañador do premio á mellor obra en galego na
Festa da Poesía Galega no San Froilán de Lugo en 1925.
O Conxunto Etnográfico de Teixois
Teixois é un vello casal ferreiro restaurado para amosar
a vida e economía da Galicia interior nos séc.XVIII e XIX.
Cun importante conxunto hidráulico formado por mazo, muiño,
batán, roda de afiar e incluso unha pequena central eléctrica,
en Teixois traballábanse as ferramentas vendidas nas feiras galegas:
tixolas, cazos, cubos, braseiros...
A forza da auga é o motor natural do Mazo de Teixois,
pesado e xigante martelo de madeira que golpea repetidamente a superficie
na que se traballa o ferro. Outro dos contados Mazos aínda en uso
nestas terras ferreiras e o de Aguillón, namentres que en Caleiro,
na parroquia de Ouria, consérvase
un forno de cal. Remontando o río Brañaeiro desde
Bres descúbrense agochados na fraga restos de vellos muiños
de auga ata albiscar a altitude do Pico de Ouroso, de 1039m, unha das maiores
altitudes da comarca, cun excelente panorama e con salvaxes reses de gando.
Esquíos, terra de ferreiros
Esquíos é unha das seculares aldeas ferreiras de Taramundi
que pervive con forza e orgullo a tradición herdada dos devanceiros.
O Museo do ferreiro Manuel Lombardía exhibe numerosas pezas
pertencentes ao seu pai, avó e bisavó, mostra das ferramentas
e útiles da vivenda tradicional galega.
Nun emotivo conxunto formado pola típica casa, cabanón,
cabazos e obradoiro, é posible presenciar o laborioso proceso de
fabricación das reputadas navallas de Taramundi. Outras industrias
artesanas destas terras son os teares encontrados no río Cabreira
desde Aguillón ata Bres, así como o delicioso queixo de vaca
de Carballo.
Para saber máis sobre Taramundi:
Conxunto Etográfico de Teixois: Teixois / Tel. 985 979 684
Concello de Taramundi: Estrada xeral / Tel. 985 646 701 |